اتعلم مراجعه – ماهى المراجعه وماهى هى أهدافها ؟

لو أنت مراجع أو لسه خريج أو حتى محاسب أو مدير مالى لازم تبقى عارف و
فاهم يعنى أيه مراجعة ؟ و إيه هى أهدافها ؟ لازم تبقى فاهم أنت نازل الشركة
تعمل ايه أو العميل مستنى منك أيه ؟ و طبعا لو انت مدير مالى لازم تبقى
عارف الراجل اللى نازل لحضرتك أو ال Team اللى هينزل لحضرتك هيعمل ايه
بالظبط ؟

عشان كده هنبتدى بأول حاجة، و نسأل بعض هى أيه المراجعة دى بص يا سيدى
المراجعة هى : عملية منظمة ومنهجية لجمع وتقييم الأدلة والقرائن بشكل
موضوعي، التي تتعلق بنتائج الأنشطة والأحداث الاقتصادية وذلك لتحديد مدى
التوافق والتطابق بين هذه النتائج والمعايير المقررة وتبليغ الأطراف
المعنية بنتائج المراجعة.
* أيه ده يا عم مصطفى أنت بتهزر صح أيه الكلام الأكاديمى ده أنت مش قولت هنخلى البساط أحمدى
هقولك يا عم طيب ما تتخضش كده ده أحنا لسه فى الأول، أسمع يا سيدى
بيقولك هى عملية منظمة و منهجية يعنى لازم تعرف أن فيه أسس و معايير و أهداف معينة بنمشى عليها عشان نعرف نراجع
أيه كمان قالك بقى الأسس و المعايير و الأهداف دى همشى عليها عشان أقدر
أجمع و أقييم الأدلة بتاعتى بشكل موضوعى يعنى الموضوع مش ماشى عباسى و خلاص
طب هى الأدلة دى بتاعة أيه ؟
دى يا باشا تخص نشاط الشركة و الأحداث المالية و الإقتصادية بتاعتها
حلو الكلام لحد هنا
طب الأدلة دى هتفدنى بأيه ؟ دى يا مدير هتفيدك بأنك تحدد مدى التوافق بين
النتائج اللى بنطلعها من عملية المراجعة و المعايير المقررة (يعنى أحنا هنا
بنراجع القوائم المالية لأى شركة طبقا لمعايير المراجعة المصرية ) يعنى مش
لمعايير من دماغنا عشان كده فى فقرة فى تقرير مراقب الحسابات بتقول:
مسئولية مراقب الحسابات
تنحصر مسئوليتنا في إبداء الرأي على هذه القوائم المالية في ضوء مراجعتنا
لها . فقد تمت مراجعتنا وفقاً لمعايير المراجعة المصرية وفى ضوء القوانين
المصرية السارية . وتتطلب هذه المعايير منا الإلتزام بمتطلبات السلوك
المهني وتخطيط وأداء المراجعة للحصول على تأكد مناسب بأن القوائم المالية
خالية من أية أخطاء هامة ومؤثرة .
طيب جميل أوى أخر حتة بقى فى تعريف المراجعة بتقولك و تبليغ الأطراف المعنية بنتائج المراجعة
الجواب باين من عنوانه يعنى أنا بعمل كل العملية دى عشان النتائج بتاعتى
أبلغ بيها أو أوصلها لأطراف معنية عشان كده بردو فى تقرير مراقب الحسابات
بنبتدى التقرير بعنوان التقرير( نوعه) هل هو تقرير مراقب حسابات أو تقرير
فحص محدود أو تقرير إجراءات متفق عليها
ثم فقرة التوجيه للأطراف المعنية اللى هما ممكن يكونوا ( أعضاء مجلس الإدارة – مساهمى الشركة – و هكذا ) و بتبقى بالشكل ده
تقرير مراقب الحسابات
إلى السادة/ مساهمي أو ( أعضاء مجلس إدارة ) شركة مصطفى محمد للإستشارات (شركة مساهمة مصرية)
تاخدنا النقطة دى بقى على بساط علاء الدين السحرى و تودينا عشان نعرف أيه هى أهداف المراجعة :
أهداف المراجعة: فى نوعين من الأهداف
1 – أهداف رئيسية :
* التحقق من صحة ودقة البيانات الحسابية المثبتة في الدفاتر ومدى الاعتماد عليها .
* إبداء رأي فني محايد يستند على أدلة قوية عن مدى مطابقة القوائم المالية للمركز المالي.
* اكتشاف ما قد يوجد بالدفاتر والسجلات من أخطاء أو غش.
* تقليص فرص ارتكاب الأخطاء والغش لوضع ضوابط وإجراءات تحول دون ذلك.
* اعتماد الإدارة عليها في تقرير ورسم السياسات الإدارية واتخاذ القرارات حاضراً أومستقبلا.
* تمكبن مستخدمى القوائم المالية من اتخاذ القرارات المناسبة لإستثماراتهم.
2 – الأهداف فرعية :
* مراقبة خطة الإدارة ومتابعة تنفيذها ومدى تحقيق الأهداف وتحديد الانحرافات وأسبابها وطرق معالجتها.
* تقييم نتائج الأعمال وفقاً للنتائج الموضوعة.
* تحقيق أقصى كفاية إنتاجية ممكنة عن طريق منع الإسراف في جميع نواحي النشاط.
* التأكد من صحة القيود المحاسبية أي خلوها من الخطأ أو التزوير، والعمل
على استكمال المستندات المثبتة لصحة العمليات والمؤيدة للقيود الدفترية.
* التأكد من صحة عمل الحسابات الختامية وخلوها من الأخطاء الحسابية والفنية سواء المتعمدة أو غيرها نتيجة الإهمال أو التقصير.
* دراسة النظم المتبعة في أداء العمليات ذات الإطار المالي والإجراءات
الخاصة بها لأن مراجعة الحسابات تبدأ بالتأكد من صحة هذه النظم.
و بكده
نقول كفاية لحد كده عشان ما تزهقوش منى عشان عارف أنك مستعجلين أننا نخش
فى المراحل بتاعة المراجعة على طول بس الكلام اللى فوق ده هنبنى عليه كل
اللى جاى بأئن الله ياريت تركزوا فيه كويس و تقرأوه مرة و أثنين عشان نقدر
نخش فى التقيل و أحنا متطمنين هسيبلكم سؤال تحت كل بوست ياريت تكتب
اللى تعرفه حتى لو غلط من غير ما تعمل سيرش و لا تبص فى كتاب مش عيب و الله
خالص بس المهم أنك تحاول تقول المعلومة اللى وصلالك بالظبط عشان لو عملت
سيرش هتكتبها و صدقنى هتنساها بعدين
السؤال بيقول : يصدر مراقب
الحسابات ( تقرير مراقب الحسابات ) عن أعمال المراجعة للقوائم المالية فى
نهاية أعمال المراجعة و لكن فى بداية عملية المراجعة و خلالها يصدر المراقب
خطابين أخرين.
عايزين نعرف بقى أيه هما الخطابين دول ؟