اتعلم مراجعه – الدرس – ماهو نشاط العميل وماهى المخاطر التى يتعرض لها نشاط العميل ؟

إتكلمنا المرة اللى فاتت عن الخطوة الأولى من :
مرحلة I التخطيط لعملية المراجعة (Phase I Palnning an audit approach)
و هى :
1- قبول عميل جديد و إجراء التخطيط المبدئى
( ( Accept client and perform initial planning
إنهاردة هنتكلم عن الخطوة الثانية و الثالثة وهم :
2- تفهم نشاط العميل و الصناعة (Understand the client’s business and industry)
3- تقييم مخاطر نشاط العميل ( Assess Client Business risk)
إتكلمنا و قولنا :
بعد إعداد خطاب الإرتباط مع العميل نبدأ فى إجراءات التخطيط المبدئى و ( اختيار وتحديد فريق العمل )
الحمد لله و إختارنا فريق العمل لازم نعمل الخطوة الثانية على طول و هى (تفهم نشاط العميل و الصناعة )
طبيعى جدا أنك نازل تراجع على شركة لازم تكون فاهم الشركة أو العميل ده بيشتغل فى أيه ؟
يبقى أول حاجة تعملها كده تجيب ورقة و قلم أو تكتب على ملف وورد أو بوربوينت زى ماتحب
و تنظم شغلك كده (كمثال)
اسم العميل : شركة ” حسن الظن بالله ” للإستثمارات ( شركة مساهمة مصرية )
الفترة المالية الخاصة بأعمال المراجعة : 31 ديسمبر 2019
و لو فيه قوائم مالية سابقة إجرى على طول على أول صفحة بعد قائمة التدفقات النقدية دى هتلاقى فيها ثروة بمعنى الكلمة
زى( أسم الشركة القانونى – العنوان الرسمى للشركة – تاريخ التأسيس – غرض الشركة الرئيسى )
و هتلاقى السياسات المحاسبية المطبقة ( أسس إعداد القوائم المالية – طريقة
معالجة الأصول الثابتة – طريقة إثبات الإيرادات و المصروفات – طريقة إثبات
العملاء و الموردين ….. و هكذا )
طب لو مفيش قوائم مالية سابقة أعمل أيه ؟
معلش هتتعب معانا شوية و أول حاجة هتطلبها السجل التجارى و الطاقة
الضريبية للمنشأة و الموقف القانونى و الضريبى بعد ده كله فى شوية عناصر
لازم تعرفها عشان تقدر تعمل تفهم لنشاط العميل و تقدر تقييم المخاطر
المحيطة بالنشاط
إيه هى العناصر دى ؟
عناصر خارجية زى ( العناصر الإقتصادية – العناصر السياسية – العناصر القانونية – تقدم التكنولوجيا فى المجال– المنافسين فى السوق )
عناصر تشغيلية زى ( الموردين الرئيسيين – العملاء الرئيسيين ، مصادر
التمويل (هل المساهمين ليهم دور و لا قروض و لا تسهيلات و لا ودائع فى
البنوك) ، كمان مصدر الإيرادات ( هل بسبب عمليات البيع او تقديم الخدمة و
لا بسبب فوائد بنكية و لا تعويضات ….و هكذا )
عناصر قانونية زى ( الهيكل التنظيمى – المساهمين الرئيسين – أعضاء مجلس الإدارة – أعضاء لجنة المراجعة الداخلية ( إن وجد ) )
عناصر إدارية و إستراتيجية زى ( دور الإدارة فى مواجهة مخاطر النشاط –
أهداف العميل و خطة إتمامها و مداها ( طويلة الأجل – قصيرة الأجل ) )
لازم كمان تبقى عارف أيه هى مقاييس تقييم الأداء Key Performance Indicators اللى الشركة وضعتها لتحقيق الأهداف دى
و كان فيه تعريف لــ مقاييس تقييم الأداء بيقول :
هو اداة تقیس الأثر والنتیجة النھائیة وتقیس مدى التقدم في تحقیق الأھداف الاستراتیجیة
وتستخدم مقاييس الاداء لقياس مؤشرات الخطط كافة والخطة الاستراتيجية
والتشغيلية على الخصوص وتستخدم ايضاً من قبل الموارد البشرية لقياس نسب
الرضا ونسب الانجاز للموظفين بالاضافة للاستخدامات في قياس نسب الربح
والايرادات والزيادة والنقص في المبيعات
فى حاجة مهمة بقى لازم تكون بردو عارفها كويس جدا جدا جدا وهى :
الأطراف ذات علاقة أو ( الشركات الشقيقة و التابعة ) – : الاطراف التى
تمتلك القدرة على السيطرة على الطرف الاخر أو كانت لديها القدرة على ممارسة
تأثير هام على الطرف الاخر فى القراراتالمالية و التشغيلية
الأطراف دى
بيحصل بينهم حاجة إسمها( معاملات ) يعنى تبادل الموارد او الالتزامات فيما
بينم بغض النظر عن وجود أى مقابل لإتمام هذا التبادل
طبعا بعد ما
بتكتب الكلام ده و تلخصه و تعمله برزينتيشن حلو تقدر من خلاله تقييم
المخاطر الخاصة بنشاط العميل و دى الخطوة رقم 3 من مرحلة I التخطيط لعملية
المراجعة (Phase I Palnning an audit approach)
– تقييم مخاطر نشاط العميل ( Assess Client Business risk)
دى بقى بتاعة بشاوات المهنة خلينا نشوف أيه بيحصل فى الخطوة دى :
أول حاجة لازم أفهمها داخل المنشأة عشان أقدر أقييم مخاطر نشاط العميل هى
الرقابة الداخلية للشركة و الأنظمة المحاسبية المعتمد عليها ( يعنى
Financial System بتاع الشركة أسمه أيه و بيعمل أيه يعنى أيه طريقة
المدخلات بتاعته و التقارير أو المخرجات اللى بيقدر يصدرها )
طيب إيه الرقابة الداخلية دى ياعم مصطفى ؟
بإختصار كده أنت فى كل شركة هتروحها هتلاقى فى حاجة إسمها :
دورة النقدية – دورة المشتريات – دورة المبيعات و هكذا
كل حاجة من دول ليها كنترول أو رقابة معينة يعنى اللى بيحصل النقدية لازم
يكون شخص مختلف عن أمين الخزينة مثلا صاحب قرار الصرف لازم يكون مختلف عن
اللى بيحصل النقدية و عن اللى بيسجل القيد مثلا و هكذا
طيب لو حصل و
لقينا أن أمين الخزينة هو اللى فأيده كل حاجة كده الكنترول هيكون فيه مشكلة
و دى بنسميها خطر بنبدأ نقييم نسبة الخطر ده قد أيه عشان نشوف نسبة خطر
التحريف الهام قد أيه ؟ و هكذا على كل دورة من دورات النظام المالى فى
الشركة
عشان كده معيار المراجعة المصرى رقم (315) ملحق (2) ذكر حتة جميلة جدا و هى :
توزيع الإختصاصات : الهدف منها تكليف أفراد مختلفون بمسئولية التصريح
بالمعاملات، و تسجيلها، و حيازة الأصول مما يؤدى إلى تقليل فرص السماح لأى
شخص بأن يكون فى موقف يسمح له بأن يرتكب فيه أو يخفى الأخطاء أو الغش أثناء
قيام هذا الشخص بمهامه العادية و تشمل الأمثلة على توزيع الإختصاصات عملية
إعداد التقارير، و فحص و إعتماد التسويات، و إعتماد و مراقبة المستندات.
بعد ما عملت تفهم للنشاط بتاع الشركة و قدرت تحدد و تقييم المخاطر الخاصة بالنشاط
وبعد الكلام الكبير ده أقدر أقولك أنك كده أنت دخلت الحرب برجليك و هتبدأ تشتغل على الخطوة الرابعة و الخامسة و هم :
4- تنفيذ إجراءات تحليلية مبدئية ( Perform preliminary analytical procedures )
5- تحديد الأهمية النسبية و تقييم المخاطر (خطر المراجعة و الخطر المتأصل )
Set Materiality and assess acceptable audit risk and inherent risk ))
ودول اللى هنتكلم عنهم المرة اللى جاية بأذن الله .. أسيبكم أنا بقى دلوقتى بس كنت حابب أقول حاجة